Sot shënohet Dita Botërore e Majtakëve: Një ditë për të vlerësuar kreativitetin dhe aftësitë e tyre unike
Sot, më 13 gusht, shënohet Dita Botërore e Majtakëve, një ditë e krijuar në Shtetet e Bashkuara në vitin 1976 për të rritur vetëdijen mbi sfidat dhe veçantitë e njerëzve që përdorin dorën e majtë.
Njerëzit majtakë përbëjnë rreth 12–15% të popullsisë së botës dhe ekspertët vlerësojnë se numri i tyre është pothuajse katërfishuar në 100 vitet e fundit, kryesisht për shkak se sot nuk janë më të detyruar të shkruajnë me dorën e djathtë.
Sipas studimeve, majtakët kanë hemisfera cerebrale të zhvilluara në mënyrë të barabartë dhe më shumë fibra nervore, gjë që i ndihmon të transferojnë informacionin më shpejt midis pjesëve të trurit. Kjo i bën ata krijues, intuitivë, strategjikë dhe me një kujtesë muzikore të jashtëzakonshme, si dhe shumë të pranishëm në fusha si arti dhe arkitektura.
Shumë nga figurat më të njohura të historisë dhe kulturës ishin majtakë, përfshirë Leonardo da Vinci, Michelangelo, Albert Einstein, Napoléon Bonaparte, Fidel Castro, Jimi Hendrix, Kurt Cobain e Ringo Starr.
Një fakt interesant: megjithëse studimet sugjerojnë se majtakët jetojnë mesatarisht 9 vjet më pak se të djathtët, ata kanë aftësi të veçanta, si përshtatje më e lehtë me shikimin nën ujë dhe një përfaqësim të lartë në sportet një-në-një si tenisi, boksi dhe skermë.
Dita Botërore e Majtakëve është një rast për të vlerësuar talentet dhe veçantitë e tyre, si dhe për të rritur ndërgjegjësimin mbi nevojën për një botë më të përshtatshme për të gjithë, pavarësisht nga dora që përdorin.
